I Sogn er det og mykje å sjå og oppleve. Her finn du verdas nordlegaste vingard, UNESCO lista attraksjonar som Nærøyfjorden og Urnes Stavkyrkje, dei høgste fjella i Norge, verdas lengste og djupaste fjord,  verdast lengste biltunnel og mykje anna som er høgt, unikt og spektakulært. 

Men underet i dei små tinga er kanskje ekstra tydeleg når dei får ein slik storslagen bakgrunn. Som å kunne drikke frå ein foss, sjå dei nyfødde lamma springe over markene, nyte lokal cider og eit gourmetmåltid basert på lokale ferske ingrediensar, padle på ein blikkstille fjord, fange ein aure i eit stille vatn og få den steikt like etterpå, gå ein roleg tur i irrgrønt landskap der fuglekvitter og bekkebrus er det einaste du høyrer. Det å vakne ein tidleg morgon og kikke ut på fjorden frå vindauget på rommet ditt i hotellet som er drive av 9. generasjon, og få servert frukosten din i hagen ved fjorden. Bli med på vandring med ei utsikt som tek pusten frå deg, eller sykle blant eple- og morelltre og strekke seg i sola når du tek ein lang pikniklunsj med lekker, lokal tapas. Følelsen av at du har all verdas tid, og har heile verda for dine føter samtidig. Kanskje blir du med på ei yogaøkt ute i naturen med fjord og fjell framfor deg, og får ein god massasje etter vandreturen. Eller topptur på ski til fjelltoppar du berre har høyrt om (eller sett på Instagram). Glede deg over ny kunnskap når geologen du har med på turen fortel om korleis alt rundt deg har blitt forma slik det er, eller når historikaren fortel om daglegliv og krig i gamle tider. Alt dette får du også i Sogn. 

I ytre Sogn kan ein oppleve vill og vakker kystnatur, nydeleg vær eller vanvittige stormar. Fiske etter stortorsk og lyr, undervannsjakt og sanking av havets delikatesser med dykking og fridykking. Besøk på fiskeoppdrett og overnatting på historiske hotell eller på rorbuer. Ein kan og ta toppturar som ikkje er for krevjande og utsikta står ikkje tilbake for det du opplever på ein topp i Jotunheimen.